Monday, March 19, 2018

வைரஸ்கள் பலவிதம். - I

நம்மைப் பொறுத்தவரை ஒரு கணினி சரியாக இயங்கவில்லை என்றால், அதை வைரஸ் தாக்கியுள்ளது என்றுத் தான் பொதுவாகக் கூறுகிறோம். ஆனால், வைரஸ் என்பது பொதுப் பெயர் இல்லை. அதன் பொதுப் பெயர் மால்வேர் (Malware) என்பதாகும். Malicious software என்பதின் சுருக்கமே Malware. Malicious என்றால் கேடு விளைவிக்கும் என அர்த்தம். நம் கணினிக்கு கேடு விளைவிக்கும் மென்பொருட்கள் அனைத்துமே இந்த மால்வேர் எனும் பெயரின் கீழே தான் வரும்.

இந்த மால்வேரில் எத்தனை வகைகள் இருக்கின்றன எனப் பார்ப்போம்.

வைரஸ் எனும் தொற்று மென்பொருள். (VIRUS)


வைரஸ் என்று அழைக்கப்படும் மென்பொருட்கள், உங்கள் கணினிக்குள் வந்தவுடன் தானாகவே இயங்கி, மற்ற ப்ரோக்ராம்களுக்கும், பைல்களுக்கும், நம் கணினியுடன் இணைக்கப்பட்டுள்ள மற்ற கணினிகள் மற்றும் பென் டிரைவ் போன்றிலுள்ள ப்ரோக்ராம்களுக்கும் தானாகவே பரவுவதைத்தான் தொற்று மேம்பொருள் (வைரஸ்) எனப்படும்.

வார்ம் (WORM)


வார்ம் எனப்படும் மென்பொருள், தன்னை இயக்கும் மென்பொருள் அல்லது எந்தவொரு மனித தலையீடும் இன்றி தன்னைத்தானே படியெடுத்து பரவும் வகையில் எழுதப்பட்டது.

பிடிவாதக் குதிரை (Trojan Horse)


இந்த வகை மென்பொருட்கள், சட்டப்படியான, உண்மையான ஒரு மென்பொருள் போலவே உங்களுக்கு அறிமுகமாகி, நீங்களே அதை உங்கள் கணினியில் பதிக்குமாறு செய்து, உங்கள் அனுமதியுடனே, உங்களுக்கு தெரியாமல் மால்வேர் மென்பொருட்களை உங்கள் கணினிக்கு இறக்குமதி செய்து விடும் மென்பொருட்களுக்கு பிடிவாதக் குதிரை என்றுப் பெயர்.

உளவு மென்பொருள் (SPYWARE)


இந்த வகை மென்பொருட்கள் உங்கள் தகவல்களைத் திருடி, உங்கள் விவரங்களை தன் எஜமானுக்கு அனுப்பிவிடும்.

கடத்தல் மென்பொருள் (RAMSOMWARE)


தற்போது, மிக அதிகமாக பரவுவதும், கணினி உபயோகிப்பாரை கதிக்கலங்க வைப்பதும், இந்த கடத்தல் மென்பொருட்கள் தான். உங்களுக்கு வரும் மின்னஞ்சலில் ஒரு வேர்ட் பைலாகவோ, ஜாவா பைலாகவோ உங்களுக்கு தெரிந்த அல்லது உங்கள் வங்கியில் இருந்து வருவது போல வரும் (பிடிவாதக் குதிரை / Trojan Horse). நீங்கள் இதைத் திறந்துப் பார்த்தால், உடனே உங்கள் கணினியில் பதிவேறி விடும். பின் உங்கள் கணினியில் உள்ள அனைத்து பைல்களையும் encrypt எனப்படும் கடவுச்சொல் (password) கொண்டு மட்டுமே திறக்க முடியும் என்ற ஜிப் பைலாக மாற்றி விடும். திரும்பவும் உங்கள் பைல்களைப் பெற, நீங்கள் அந்த கடவுச்சொல்லைக் கொடுத்தால் மட்டுமே திறக்க முடியும். அந்தக் கடவுச்சொல் தேவைப்படின் அந்த மால்வேர் எழுதியவருக்கு பல ஆயிரங்கள் (சில சமயம் லட்சங்களில்) கொடுத்தால் மட்டுமே உங்கள் பைல்களைத் திரும்பப் பெற முடியும். இவர்கள் தான் இணையவெளி குற்றவாளிகள் (Cyber Criminals) என்று அழைக்கப்படுகிறார்கள்.

வேர்ப்பொருள் (ROOTKIT)


இந்த மென்பொருட்கள், உங்கள் கணினியின் முழுக் கட்டுப்பாட்டையும் தன் வசம் வைத்துக்கொள்ளும்படி எழுதப்பட்டது. இவை பதிந்தவுடன், உங்கள் கணினியை வெளியிலிருந்து இந்த மென்பொருளை எழுதியவர் இயக்க ஒரு வழியை ஏற்படுத்தி விடும்.

---------------------------------------- தொடரும் -------------------------------------

Sunday, March 11, 2018

விண்டோஸ் 10 Windows 10 Installation error WHEA

Windows 10 அமைக்கும் போது  WHEA_UNCORRECTABLE ERROR என்று வருகிறது. என்ன செய்யலாம் என்று ஒரு டெல் கணினியை ஒருவர் எடுத்துக் கொன்டு வந்தார். ஹார்ட் டிரைவ், ராம், மதர்போர்ட் போன்றவற்றை செக் செய்தாலும் ஒன்றும் மாறவில்லை. USB அல்லது DVD எதில் பூட் செய்தாலும், விண்டோஸ் லோகோ வந்து 20 நொடிகளிலேயே இந்த தவறு வருகிறது. இந்த தவறுக்கு தவறான டிரைவர் தான் காரணமாக இருக்கும் என்று மைக்ரோசாப்ட் சொல்கிறது. ஆனால் இன்னும் விண்டோஸ் அமைக்கப்படவே இல்லையே. அப்புறம் எப்படி இந்த தவறு வருகிறது.

நோய் நாடி நோய் முதல் நாடி

முதல் இந்த தவறுக்குக் காரணம் என்னவென்று ஆராய்ந்ததில் Sysrep எனும் ப்ரோக்ராம் தான் இதற்குக் காரணம் என்று தெரிந்தது. sysprep ப்ரோக்ராம் விண்டோஸ் அமைக்கும்போது வேகமாக அமைப்பதற்காக உருவாக்கப்பட்டது. இதில் ஒரு சில குறைபாடுகள் உண்டு. அனைத்து விதமான கணினிகளின் டிரைவர்களும் இதில் இருக்காது. இந்த கணினி ஒரு வருடம் முன் வாங்கப்பட்டது என்றாலும், அதில் இருந்த ஓரிஜினல் விண்டோஸ் ரெகவர் பண்ண முடியாததாலும், டெல் கம்பெனியில் இருந்து வர நாட்களாகும் என்பதாலும், தற்காலிகமாக விண்டோஸ் ட்ரையல் அமைக்கும்போது தான் இந்த பிரச்சினை வந்தது.

சோதனை முயற்சிகள்.

sysrep அடிப்படை உறுப்புகளுக்கு (Basic components) டிரைவர்கள் அமைக்கும் போது தவறு நேருகிறது. எனவே biosஇல் உள்ள ஒரு சில உறுப்புகளை disable செய்துப் பார்க்க முயற்சி எடுக்கப்பட்டது. Serial port, USB 3.0, Parallel port, Ethernet port  என்று ஒவ்வொன்றாக disable செய்யப்பட்டு சோதித்து பார்க்கப்பட்டது. எதுவும் பிரட்சினையை சரி செய்யவில்லை. Multi core Processorஇல் நாம் வேண்டும் என்றால் எந்த coreஐ வேண்டுமானால் on அல்லது off செய்யலாம். இந்த வகையில், அனைத்து கோர்களையும் அனைத்து விட்டு ஒரே ஒரு கோரை மட்டும் வைத்துக் கொண்டு விண்டோஸ் அமைக்கும்போது ஒழுங்காக சென்றது.

முடிவு

விண்டோஸ் அமைக்கும்போது, பூட் ஆகிய உடனே, விண்டோஸ் லோகோ வரும்போதே WHEA error வந்தால், bios சென்று ஒவ்வொரு உறுப்பையும் அணைத்து விட்டு விண்டோஸ் அமைத்து விட்டு, அதன் பின் bios சென்று, மறுபடியும் ஒவ்வொன்றையும் ஆன் செய்யவும்.

If installaing windows, while displaying the windows logo at start, if the error WHEA occurs, go to bios, disable all the basic components like multi-core of the processor, audio, ethernet, etc., and try. After install the windows, go to bios and re-enable all the components.